ஸ்பெயினின் தெற்கு அண்டலூசியா பிராந்தியத்தில் உள்ள அடமுஸ் (Adamuz) நகருக்கு அருகில் இரண்டு அதிவேக ரயில்கள் மோதிய கோர விபத்தில் சுமார் 39 பேர் உயிரிழந்துள்ளனர். ஞாயிற்றுக்கிழமை மாலை நடந்த இந்த விபத்து, ஸ்பெயினின் அண்மைய வரலாற்றில் நடந்த மிக மோசமான ரயில் விபத்தாகப் பதிவு செய்யப்பட்டுள்ளதுடன், மேலும் பலர் காயமடைந்து மருத்துவமனையில் அனுமதிக்கப்பட்டுள்ளனர்.
கிடைத்த தகவலின்படி, மலகா (Málaga) இலிருந்து மாட்ரிட் நோக்கிச் சென்று கொண்டிருந்த Iryo நிறுவனத்திற்குச் சொந்தமான ரயில் தடம் புரண்டு, அருகிலுள்ள ரயில் பாதைக்குள் நுழைந்ததால் இந்த விபத்து நடந்துள்ளது. அப்போது, மாட்ரிட்டில் இருந்து ஹுஎல்வா (Huelva) நோக்கி எதிர் திசையில் வந்து கொண்டிருந்த Renfe Alvia என்ற அரசு ரயில், தடம் புரண்டு பாதையை மறித்த Iryo ரயிலுடன் மோதியது. இந்த பயங்கர மோதலால் பல ரயில் பெட்டிகள் தண்டவாளத்தில் இருந்து வெளியேறி, சுமார் நான்கு மீட்டர் பள்ளத்தில் விழுந்து நொறுங்கியுள்ளன.
விபத்து நடந்த நேரத்தில் இரண்டு ரயில்களிலும் 500க்கும் மேற்பட்ட பயணிகள் பயணித்துள்ளனர். சிதைந்த ரயில் பெட்டிகளின் இரும்பு மற்றும் இருக்கைகளுக்கு இடையில் பயணிகள் சிக்கியிருந்ததாக மீட்புப் பணியாளர்கள் தெரிவித்தனர். உயிருடன் இருந்தவர்களை மீட்க இடிபாடுகளுக்கு அடியில் இருந்த சடலங்களை அகற்ற வேண்டியிருந்தது என்றும், இது மிகவும் சிக்கலான மற்றும் வேதனையான ஒரு நடவடிக்கை என்றும் கோர்டோபா தீயணைப்புத் துறைத் தலைவர் குறிப்பிட்டார்.
ஸ்பெயின் போக்குவரத்து அமைச்சர் ஆஸ்கார் புயன்டே (Óscar Puente) இந்த சம்பவத்தை "அசாதாரணமானது மற்றும் விளக்க முடியாதது" என்று விவரித்தார். ஏனெனில் விபத்துக்குள்ளான Iryo ரயில் நான்கு ஆண்டுகளுக்கும் குறைவாகப் பயன்படுத்தப்பட்ட ஒரு நவீன ரயில் என்றும், அது சில நாட்களுக்கு முன்புதான் ஆய்வு செய்யப்பட்டதாகவும் அவர் கூறினார். மேலும், விபத்து நடந்த இடம் ரயில் பாதையின் மிகவும் நேரான பகுதி என்றும் அமைச்சர் சுட்டிக்காட்டினார். போக்குவரத்து அமைச்சகத்தின் கீழ் செயல்படும் ஒரு சுயாதீன அமைப்பான ரயில் விபத்து விசாரணை ஆணையம் (CIAF) இந்த சம்பவம் குறித்து முழுமையான தொழில்நுட்ப விசாரணையை ஏற்கனவே தொடங்கியுள்ளது.
பாதிக்கப்பட்டவர்களுக்கும் அவர்களது உறவினர்களுக்கும் ஆதரவளிக்க சிறப்பு உளவியலாளர் குழுக்களும், இராணுவ அவசரகாலப் பதிலளிப்புப் பிரிவுகளும் (UME) ஈடுபடுத்தப்பட்டுள்ளன. இந்த விபத்தைத் தொடர்ந்து, மாட்ரிட் மற்றும் அண்டலூசியா இடையே அதிவேக ரயில் போக்குவரத்து முழுமையாக நிறுத்தப்பட்டுள்ளது. மேலும், உயிரிழந்தவர்களின் எண்ணிக்கை மேலும் அதிகரிக்கக்கூடும் என்று மீட்புப் பணிகள் பிரிவுகள் எச்சரித்துள்ளன.
