தேசிய சுதந்திர முன்னணியின் தலைவர், முன்னாள் அமைச்சர் விமல் வீரவன்சவின் தலைமையில், 'பிள்ளைகளுக்காகப் பெரியவர்கள்' என்ற தொனிப்பொருளில் கொழும்பில் விசேட ஊடகவியலாளர் சந்திப்பு நடைபெற்றது. இது மகா சங்கத்தினரின் கோரிக்கைக்கு இணங்க சிவில் அமைப்புக்களின் பிரதிநிதிகளின் பங்கேற்புடன் ஏற்பாடு செய்யப்பட்டிருந்தது. இந்த நிகழ்வில் கலந்துகொள்ள 'சுரக்கிமு ஸ்ரீ லங்கா' இயக்கத்தின் தலைவர் வணக்கத்துக்குரிய பாஹியங்கல ஆனந்த சாகர தேரர் உறுதியளித்திருந்த போதிலும், அவர் அங்கு வரவில்லை. திங்கட்கிழமை காலை முதல் தொடர்ச்சியான சத்தியாக்கிரகத்தை ஆரம்பிக்கவுள்ளதாக முன்னாள் அமைச்சர் அங்கு அறிவித்தார்.
அதன் பின்னர், மல்வத்து மற்றும் அஸ்கிரி மகாநாயக்க தேரர்களைச் சந்திப்பதற்கு குறுகிய அறிவித்தலுடன் நேரம் ஒதுக்கிய விமல் வீரவன்ச, ஞாயிற்றுக்கிழமை காலையில் கண்டிக்குச் சென்று அவர்களைச் சந்தித்து, புத்தகங்களில் இருந்து பக்கங்களை நீக்குவதன் மூலம் இந்த கல்விப் பிரச்சினைக்கு தீர்வு காண முடியாது என்பதை சுட்டிக்காட்டினார்.மகாநாயக்க தேரர்களின் ஆசீர்வாதத்துடனும் அறிவுறுத்தலுடனும், திட்டமிட்டபடி திங்கட்கிழமை காலையில் தொடர்ச்சியான சத்தியாக்கிரகம் ஆரம்பிக்கப்பட்டது. அப்போது பல அரசியல் கட்சிகளின் தலைவர்களின் ஆதரவு கிடைத்தது. சர்வ ஜன பலய கூட்டணி ஊடகவியலாளர் சந்திப்பொன்றை நடத்தி தமது ஆதரவைத் தெரிவித்ததோடு, அதன் உப தலைவர் பேராசிரியர் சன்ன ஜயசுமன சத்தியாக்கிரக இடத்திற்கு வந்து இணைந்துகொண்டார். இதற்கிடையில், சத்தியாக்கிரகத்தை தடை செய்ய பொலிஸார் நீதிமன்ற உத்தரவைப் பெறத் தயாராகி வருவதாக தகவல்கள் வெளியாகிய போதிலும், பொது அமைதிக்கு பங்கம் விளைவிக்காத வகையில் போராட்டங்களை நடத்த நீதிமன்றம் அனுமதி அளித்திருந்தது. நீதிமன்ற உத்தரவுடன் வந்த பொலிஸ் அதிகாரிகளும் அங்கு கூடியிருந்த மக்களுடன் மோதல்கள் ஏற்படாதவாறு மிகவும் இணக்கமாகச் செயல்பட்டனர்.
சத்தியாக்கிரகத்தை ஆரம்பித்து வைத்து விமல் வீரவன்ச, 'ஹரினிக்கு அடிக்கும்போது லால் ஊயியா ஆகிறார்' என்று கூறினார். சத்தியாக்கிரகம் ஆரம்பித்து சில மணிநேரங்களுக்குப் பிறகு, அமைச்சர் கே.டி. லால் காந்த அதற்குப் பதிலளித்து விமல் வீரவன்சவுக்கு ஒரு குறுஞ்செய்தி அனுப்பியிருந்தார். 'விமல், நீ ஒரு தேசிய தலைவனாக இரு, ஜயந்த போன்றவர்களுக்கு எங்களை அடிக்கச் சொல்' என்று அந்த குறுஞ்செய்தியில் குறிப்பிடப்பட்டிருந்தது. எவ்வாறாயினும், சத்தியாக்கிரகம் ஆரம்பிக்கப்பட்ட மறுநாள், அதாவது செவ்வாய்க்கிழமை, கல்வி சீர்திருத்தங்களின் கீழ் ஆறாம் வகுப்பு சீர்திருத்த செயல்முறையை தற்காலிகமாக நிறுத்துவதாக அரசாங்கம் அறிவித்தது. அமைச்சரவை ஊடகப் பேச்சாளர் அமைச்சர் வைத்தியர் நலிந்த ஜயதிஸ்ஸ, முதலாம் வகுப்பு சீர்திருத்தங்கள் இந்த ஆண்டு முதல் அமுல்படுத்தப்பட்டாலும், ஆறாம் வகுப்பு சீர்திருத்தங்கள் அடுத்த ஆண்டு முதல் அமுல்படுத்தப்படும் என தீர்மானிக்கப்பட்டுள்ளதாகக் குறிப்பிட்டார்.
அரசாங்கத்தின் இந்த முடிவை நேரடியாகப் பார்த்த விமல் வீரவன்ச சிரித்துக்கொண்டே தனது முயற்சி வெற்றி பெற்றதாகவும், சத்தியாக்கிரகத்தை நிறுத்த வேண்டிய நேரம் வந்துவிட்டதாகவும் கூறினார். சத்தியாக்கிரகத்தை முடித்துக்கொண்டு வீடு திரும்பிக்கொண்டிருந்த விமல் வீரவன்சவுக்கு முன்னாள் ஜனாதிபதி ரணில் விக்கிரமசிங்கவிடம் இருந்து தொலைபேசி அழைப்பு வந்தது. அப்போது முன்னாள் ஜனாதிபதி, 'நான் போராட்டத்தை ஆரம்பித்தபோதும் உங்களுக்கு அழைத்தேன், இப்போது வெற்றியின் காரணமாக அழைக்கிறேன்' என்று கூறி வாழ்த்து தெரிவித்தார். 'விமல், நீங்கள் ஹரினிக்கு என்ன செய்தீர்கள்?' என்று ரணில் விக்கிரமசிங்க கேட்டபோது, விமல் வீரவன்ச சிரித்துக்கொண்டே 'நான் எதுவும் செய்யவில்லை' என்று பதிலளித்தார். எதிர்க்கட்சித் தலைவர் செய்ய வேண்டிய பணியை விமல் செய்து வெற்றி பெற்றதாகக் கூறி ரணில் விக்கிரமசிங்க தொலைபேசி உரையாடலை முடித்துக்கொண்டார்.