அதிக இரத்தப்போக்கு ஏற்படுவதாகக் கூறி மாரவில அடிப்படை மருத்துவமனையில் அனுமதிக்கப்பட்ட ஒரு பெண்ணின் கருப்பையில் இருந்து இரண்டு கண்ணாடி பாட்டில்களை அறுவை சிகிச்சை மூலம் அகற்றுவதற்கு அந்த மருத்துவமனையின் மருத்துவர்கள் நடவடிக்கை எடுத்துள்ளனர். நாத்தாண்டியா பிரதேசத்தைச் சேர்ந்த 35 வயதுடைய இந்தப் பெண் கடந்த 9ஆம் திகதி சிகிச்சைக்காக மருத்துவமனையில் அனுமதிக்கப்பட்டுள்ளார்.
கடந்த ஜனவரி மாதம் முதலாம் திகதி தான் பணிபுரியும் நிறுவனத்தின் உரிமையாளரின் வீட்டில் நடைபெற்ற விருந்துபசாரத்தின் போது இந்தச் சம்பவத்தை எதிர்கொண்டதாக குறித்த பெண் மருத்துவர்களிடம் தெரிவித்துள்ளார். அந்த நேரத்தில் தான் அதிக மது அருந்தியிருந்ததாகவும், அங்கு இருந்த இரண்டு நபர்கள் தன்னை பாலியல் வன்கொடுமை செய்ததாகவும் அவர் மேலும் குறிப்பிட்டுள்ளார்.
நோயாளி மருத்துவமனையில் அனுமதிக்கப்பட்ட பின்னர் மேற்கொள்ளப்பட்ட ஸ்கேன் பரிசோதனையில் அவரது வயிற்றில் இரண்டு பாட்டில்கள் இருப்பது மருத்துவர்களால் அவதானிக்கப்பட்டது. அதன்படி, மாரவில மருத்துவமனையின் மருத்துவக் குழு உடனடியாக செயல்பட்டு அறுவை சிகிச்சை மூலம் அந்த பாட்டில்களை அகற்ற நடவடிக்கை எடுத்துள்ளது.
சம்பவம் தொடர்பாக விசாரணைகளை ஆரம்பித்த மாரவில பொலிஸார், பெண்ணை பாலியல் வன்கொடுமை செய்ததாகக் கூறப்படும் நாத்தாண்டியா, பிலாகட்டுமுல்ல பிரதேசத்தைச் சேர்ந்த இரண்டு நபர்களையும், அதற்கு உடந்தையாக இருந்ததாகக் கூறப்படும் ஒரு பெண்ணையும் கைது செய்துள்ளனர். இவ்வாறு கைது செய்யப்பட்டவர்கள் பாதிக்கப்பட்ட பெண் பணிபுரிந்த நிறுவனத்தின் உரிமையாளர் மற்றும் அதன் இரண்டு ஊழியர்கள் ஆவர்.
குற்றம் நடந்த நாளில் நடைபெற்ற விருந்தில் மருத்துவமனையில் அனுமதிக்கப்பட்டுள்ள பெண்ணும் சந்தேக நபர்களும் அதிக அளவில் மதுபானம் மற்றும் போதைப்பொருட்களைப் பயன்படுத்தியுள்ளனர் என்று பொலிஸ் விசாரணைகளில் மேலும் தெரியவந்துள்ளது. கைது செய்யப்பட்ட மூன்று சந்தேக நபர்களும் மாரவில நீதவான் நீதிமன்றத்தில் ஆஜர்படுத்தப்பட்ட பின்னர் எதிர்வரும் 13ஆம் திகதி வரை விளக்கமறியலில் வைக்க உத்தரவிடப்பட்டுள்ளது.