போலந்துக்கு சட்டவிரோதமாகச் செல்ல போலி வீசாக்களைப் பயன்படுத்த முயன்ற நான்கு இலங்கையர்கள் கட்டுநாயக்க பண்டாரநாயக்க சர்வதேச விமான நிலையத்தில் கைது செய்யப்பட்டுள்ளனர். இன்று (06) காலை இந்தியாவின் புதுடெல்லியில் இருந்து நாட்டிற்கு வந்துகொண்டிருந்தபோது குடிவரவு மற்றும் குடியகல்வுத் திணைக்கள அதிகாரிகளால் அவர்கள் கைது செய்யப்பட்டனர்.
கைது செய்யப்பட்டவர்களில் நீர்கொழும்பு பிரதேசத்தைச் சேர்ந்த 22 வயதுடைய தம்பதியினர், கொழும்பு வெல்லம்பிட்டி பிரதேசத்தைச் சேர்ந்த 28 வயதுடைய ஒருவர் மற்றும் யாழ்ப்பாணம் கரவெட்டி பிரதேசத்தைச் சேர்ந்த 45 வயதுடைய ஒருவர் ஆகியோர் அடங்குவதாக குடிவரவு மற்றும் குடியகல்வுத் திணைக்களம் தெரிவித்துள்ளது.
போலந்துக்கு சட்டபூர்வமாகச் செல்வதற்காக இந்த நபர்கள் தரகர்களுக்கு 64 இலட்சம் ரூபாவை செலுத்தியுள்ளதாகத் தெரிவிக்கப்படுகிறது. அதன்படி, அவர்கள் வீசா பெறுவதற்காக இந்தியாவின் புதுடெல்லியில் உள்ள போலந்து தூதரகத்திற்குச் சென்று கைரேகைகளைப் பதிவு செய்துள்ளனர். இன்று காலை 6.00 மணியளவில் புதுடெல்லியில் இருந்து ஸ்ரீலங்கன் விமான சேவைக்குச் சொந்தமான விமானம் மூலம் கட்டுநாயக்க விமான நிலையத்திற்கு வந்த அவர்கள், குடிவரவு அனுமதிப்பத்திரங்களுக்காக சமர்ப்பித்த வீசா அனுமதிப்பத்திரங்கள் குறித்து சந்தேகம் எழுந்துள்ளது. இந்த ஆவணங்கள் குடிவரவு மற்றும் குடியகல்வுத் திணைக்களத்தின் எல்லை கண்காணிப்புப் பிரிவுக்கு அனுப்பப்பட்டு மேற்கொள்ளப்பட்ட தொழில்நுட்பப் பரிசோதனைகளில் அவை போலியான வீசா அனுமதிப்பத்திரங்கள் என உறுதிப்படுத்தப்பட்டுள்ளது.
எவ்வாறாயினும், இந்த வீசா அனுமதிப்பத்திரங்கள் போலியானவை என்பது கைது செய்யப்படும் வரை விமானப் பயணிகளுக்குத் தெரியாது என்பது தெரியவந்துள்ளது. மேலும், இலங்கைக்கு வந்த பின்னர் இந்த போலி வீசா அனுமதிப்பத்திரங்களுக்காக தரகர்களுக்கு மேலும் ஒரு பெரிய தொகையை செலுத்த அவர்கள் தயாராக இருந்ததும் விசாரணைகளில் தெரியவந்துள்ளது.
இந்த சம்பவம் தொடர்பில் குடிவரவு மற்றும் குடியகல்வுத் திணைக்களம் மேலதிக விசாரணைகளை மேற்கொண்டு வருகிறது.