பூஸ்ஸா அதி உயர் பாதுகாப்பு சிறைச்சாலையில் நேற்று ஏற்பட்ட அமைதியற்ற நிலை தற்போது கட்டுப்பாட்டுக்குள் கொண்டுவரப்பட்டுள்ளதாக சிறைச்சாலை அதிகாரிகள் தெரிவிக்கின்றனர்.
இந்த மோதல் நிலைமை நேற்று மாலை ‘டி’ வார்டில் தடுத்து வைக்கப்பட்டுள்ள அதி உயர் பாதுகாப்பு கைதிகள் குழுவொன்று உடல் பயிற்சிக்காக வெளியே அழைத்து வரப்பட்டு மீண்டும் வார்டுக்குள் சேர்க்க தயாரானபோது ஆரம்பித்தது.
மீண்டும் வார்டுகளுக்குள் செல்ல எதிர்ப்பு தெரிவித்த சில கைதிகள் சிறைச்சாலையின் கூரை மீது ஏறி கூச்சலிட்டு வன்முறையாக நடந்துகொண்டதாகவும், அவர்கள் சிறைச்சாலை சொத்துக்களுக்கும் சேதம் விளைவித்துள்ளதாகவும் சிறைச்சாலை உள் வட்டாரங்கள் தெரிவிக்கின்றன.
இந்த நிலைமையைக் கட்டுப்படுத்த, சிறைச்சாலை அதிகாரிகள் மற்றும் பொலிஸ் விசேட அதிரடிப்படையின் (STF) சுமார் ஐம்பது பேர் கொண்ட குழுவொன்று கூட்டு நடவடிக்கையை மேற்கொண்டது. அப்போது இரு தரப்பினருக்கும் இடையே சூடான வாக்குவாதமும் சில தள்ளுமுள்ளுகளும் இடம்பெற்றுள்ளன.
பாதுகாப்புப் படையினரால் மேற்கொள்ளப்பட்ட தாக்குதல்கள் காரணமாக சில கைதிகளுக்கு காயங்கள் ஏற்பட்டதாக உத்தியோகபூர்வமற்ற தகவல்கள் வெளியாகியுள்ள போதிலும், இது குறித்து சிறைச்சாலை அதிகாரிகள் இதுவரை உத்தியோகபூர்வமாக உறுதிப்படுத்தவில்லை.
இந்த சம்பவத்துடன் தொடர்புடைய கைதிகளில், கணேமுல்ல சஞ்சீவ கொலை வழக்கின் பிரதான சந்தேகநபர்களில் ஒருவரான சமிந்து தில்ஷானும் அடங்குவதாக தகவல்கள் வெளியாகியுள்ளன. மேலும், போதைப்பொருள் கடத்தல் மற்றும் ஒழுங்கமைக்கப்பட்ட குற்றங்களுடன் தொடர்புடைய குற்றச்சாட்டுகளை எதிர்கொள்ளும் பட்டுமீயா, ஹாவா, கனத்தே சுது மற்றும் பிலால் போன்றோரும் இந்த மோதலில் ஈடுபட்டுள்ளதாக தெரிவிக்கப்படுகிறது.
இந்த மோதல் நிலைமைக்கு உடனடி காரணம், பூஸ்ஸா சிறைச்சாலைக்கு புதிதாக நியமிக்கப்பட்ட அத்தியட்சகரால் விதிக்கப்பட்ட புதிய விதிகள் என்று கூறப்படுகிறது. குறிப்பாக, வெளியிலிருந்து கொண்டுவரப்படும் உணவுப் பொட்டலங்கள் பரிமாற்றம் மூலம் போதைப்பொருள் மற்றும் தடைசெய்யப்பட்ட பொருட்கள் சிறைச்சாலைக்குள் கடத்தப்படும் ஒரு வர்த்தகம் நடைபெறுவதாக அவதானிக்கப்பட்டதால், கைதிகள் குழுக்களாக உணவைப் பகிர்வதைக் கட்டுப்படுத்த புதிய அத்தியட்சகர் நடவடிக்கை எடுத்துள்ளார்.
எவ்வாறாயினும், நேற்று இரவு பாதுகாப்புப் படையினரின் தலையீட்டினால் நிலைமை முழுமையாகக் கட்டுப்படுத்தப்பட்டு, அனைத்து கைதிகளும் மீண்டும் அவர்களது வார்டுகளுக்கு அனுப்பப்பட்டுள்ளதாக சிறைச்சாலை திணைக்களம் தெரிவித்துள்ளது.
சம்பவம் குறித்து விசாரணை நடத்த விசேட விசாரணை குழுவொன்றை நியமிக்க தீர்மானிக்கப்பட்டுள்ளதுடன், வன்முறையாக நடந்துகொண்ட கைதிகளை அடையாளம் கண்டு அவர்களை வேறு சிறைச்சாலைகளுக்கு மாற்றுவது குறித்தும் சிறைச்சாலை திணைக்களத்தின் கவனம் செலுத்தப்பட்டுள்ளது.