சீனா உலகின் இரண்டாவது பெரிய பொருளாதார நாடாக, வேகமாக வீழ்ச்சியடைந்து வரும் பிறப்பு விகிதத்தை உயர்த்துவதற்கான ஒரு உத்தியாக, ஜனவரி 1 ஆம் தேதி முதல் கருத்தடை சாதனங்களுக்கு 13% விற்பனை வரியை விதிக்கவும், குழந்தை பராமரிப்பு சேவைகளை வரியிலிருந்து விலக்கு அளிக்கவும் நடவடிக்கை எடுத்துள்ளது. 1994 ஆம் ஆண்டு முதல் நாட்டில் நடைமுறையில் இருந்த ஒரு குழந்தை கொள்கை இருந்த காலத்தில் வழங்கப்பட்ட பல வரிச் சலுகைகளை நீக்கி இந்த புதிய வரிச் சீர்திருத்தங்கள் அறிமுகப்படுத்தப்பட்டுள்ளன. இதற்கு இணையாக, திருமண சேவைகள் மற்றும் முதியோர் பராமரிப்பு சேவைகளும் மதிப்பு கூட்டு வரியிலிருந்து (VAT) விலக்கு அளிக்க அதிகாரிகளால் நடவடிக்கை எடுக்கப்பட்டுள்ளது.
வயதான மக்கள் தொகை அதிகரிப்பு மற்றும் பொருளாதார வளர்ச்சி மந்தநிலை போன்ற சவால்களுக்கு மத்தியில், பெய்ஜிங் நிர்வாகம் இளைஞர்களை திருமணம் செய்து கொள்ளவும், குழந்தைகள் பெற்றுக்கொள்ளவும் ஊக்குவித்து வருகிறது. இருப்பினும், உத்தியோகபூர்வ புள்ளிவிவரங்களின்படி, சீன மக்கள் தொகை தொடர்ந்து மூன்று ஆண்டுகளாக குறைந்து வருகிறது. 2024 ஆம் ஆண்டில் ஒரு தசாப்தத்திற்கு முன்னர் இருந்த மதிப்பில் பாதியளவு குழந்தை பிறப்புகள் மட்டுமே பதிவாகியுள்ளன.
இருப்பினும், கருத்தடை உறைகள் மற்றும் கருத்தடை மாத்திரைகள் போன்ற அத்தியாவசிய சுகாதாரப் பொருட்களுக்கு வரி விதிப்பது சமூகத்தில் விமர்சனத்திற்கு உள்ளாகியுள்ளது. கருத்தடை உறைகளின் விலை அதிகரிப்பதால் மட்டும் மக்களை குழந்தைகள் பெற்றுக்கொள்ள ஊக்குவிக்க முடியாது என்றும், இது தேவையற்ற கர்ப்பங்கள் மற்றும் பாலியல் நோய்கள் அதிகரிக்க வழிவகுக்கும் என்றும் பலர் சுட்டிக்காட்டுகின்றனர்.
பெய்ஜிங்கில் உள்ள ஒரு ஆராய்ச்சி நிறுவனம் வெளியிட்ட அறிக்கையின்படி, ஒரு குழந்தையை வளர்ப்பதற்கு உலகில் அதிக செலவு பிடிக்கும் நாடுகளில் ஒன்றாக சீனா கருதப்படுகிறது. பள்ளி கட்டணங்கள் அதிகரிப்பு, கடுமையான போட்டி நிறைந்த கல்விச் சூழல் மற்றும் பெண்களுக்கு வேலை மற்றும் குடும்ப வாழ்க்கையை சமநிலைப்படுத்துவதில் உள்ள சிரமங்கள் இதற்கு முக்கிய காரணங்களாக அடையாளம் காணப்பட்டுள்ளன.
ரியல் எஸ்டேட் நெருக்கடி மற்றும் பொருளாதார நிச்சயமற்ற தன்மை காரணமாக இளம் குடும்பங்கள் தங்கள் எதிர்காலம் குறித்து தயக்கத்துடன் உள்ளன. மெட்ரோ ரயில் கட்டணம் அதிகரித்தாலும் பயணங்கள் நிறுத்தப்படாதது போலவே, வரிகள் அதிகரித்தாலும் கருத்தடை முறைகளைப் பயன்படுத்துவதை நிறுத்த மாட்டோம் என்று சில இளைஞர்கள் கூறுகின்றனர்.
ஆனால், பொருளாதார ரீதியாக பின்தங்கிய பல்கலைக்கழக மாணவர்கள் மற்றும் குறைந்த வருமானம் கொண்டவர்கள் இந்த விலை உயர்வு காரணமாக பாதுகாப்பான நடவடிக்கைகளை எடுக்காமல் அல்லது ஆபத்தான நடத்தைகளில் ஈடுபடக்கூடும் என்று சமூக ஆர்வலர்கள் எச்சரிக்கின்றனர். இது இந்த கொள்கையின் மிகவும் ஆபத்தான விளைவாக இருக்கலாம் என்று அவர்கள் கருதுகின்றனர்.
இந்த வரிச் சீர்திருத்தம் பிறப்பு விகிதத்தை அதிகரிக்க எடுக்கப்பட்ட ஒரு நடவடிக்கை மட்டுமல்ல, ரியல் எஸ்டேட் சந்தை சரிவு மற்றும் அதிகரித்து வரும் தேசிய கடன் சுமைக்கு மத்தியில் அரசாங்கத்தின் வருவாயை அதிகரிக்கும் ஒரு உத்தியாகவும் இருக்கலாம் என்று சில பொருளாதார வல்லுநர்கள் சுட்டிக்காட்டுகின்றனர்.
சீன அரசாங்கம் மக்களின் தனிப்பட்ட வாழ்க்கையில் தேவையற்ற தலையீடு செய்வதற்கும் எதிர்ப்பு கிளம்பியுள்ளது. சில மாகாணங்களில் பெண்களின் மாதவிடாய் சுழற்சி மற்றும் குழந்தை பெற்றுக்கொள்ளும் திட்டங்கள் குறித்து உள்ளூர் அதிகாரிகள் தொலைபேசி அழைப்புகள் மேற்கொள்வது போன்ற சம்பவங்கள் அரசாங்கத்தின் நற்பெயருக்கு களங்கம் ஏற்படுத்தியுள்ளதாக விமர்சகர்கள் கூறுகின்றனர்.
தற்போதைய இளம் தலைமுறையினர் கடுமையான சமூக மற்றும் மன அழுத்தத்தால் மனித உறவுகளை உருவாக்குவதற்கு பதிலாக தனிமைப்படுத்தப்பட்ட வாழ்க்கையை வாழவும், திருமணத்தை தாமதப்படுத்தவும் அதிக ஆர்வம் காட்டுவதாகத் தெரிகிறது. பௌதீக வளர்ச்சி எப்படி இருந்தாலும், அவர்கள் மீது சுமத்தப்பட்டுள்ள அதிகப்படியான எதிர்பார்ப்புகள் காரணமாக இளம் தலைமுறையினர் மிகவும் சோர்வடைந்துள்ளனர்.