பொலன்னறுவை, வெலிகந்த பிரதேசத்தில் பொலிஸ் உத்தியோகத்தர்களின் கடமைக்கு இடையூறு விளைவித்து, கூரிய ஆயுதத்தால் தாக்க முயன்ற ஒருவர் பொலிஸாரால் சுடப்பட்டு உயிரிழந்துள்ளார்.
வெலிகந்த, கல்கந்த பிரதேசத்தில் ஜனவரி 12 ஆம் திகதி மாலை 6.00 மணியளவில் இந்த துப்பாக்கிச் சூடு சம்பவம் இடம்பெற்றுள்ளதுடன், பொலிஸ் வீதித் தடையை மீறிச் சென்ற மோட்டார் சைக்கிளை துரத்திச் சென்றபோது இந்த மோதல் நிலைமை ஏற்பட்டுள்ளது.
பொலிஸ் உத்தியோகத்தர்கள் குறித்த மோட்டார் சைக்கிளை நிறுத்துமாறு சைகை செய்த போதிலும், சந்தேகநபர்கள் அதனை நிறுத்தாமல் செலுத்தியுள்ளனர். பின்னர், சந்தேகநபர்கள் கஞ்சா அல்லது வேறு போதைப்பொருட்களை கடத்திச் செல்வதாக ஏற்பட்ட சந்தேகத்தின் பேரில் பொலன்னறுவை போக்குவரத்துப் பிரிவின் உத்தியோகத்தர்கள் அவர்களை துரத்திச் சென்றுள்ளனர்.
மோட்டார் சைக்கிளில் வந்த மூவரில் இருவர் தப்பிச் சென்றுள்ளதாகவும், பிரதான சந்தேகநபர் தனது வீட்டிற்கு ஓடிச் சென்று வாள் போன்ற கூரிய ஆயுதத்தை எடுத்து வந்து பொலிஸ் உத்தியோகத்தர் ஒருவரை முழங்காலில் அமர வைத்து தாக்க முயன்றதாகவும் பொலிஸ் விசாரணைகளில் தெரியவந்துள்ளது.
அந்த சந்தர்ப்பத்தில், பொலிஸ் உத்தியோகத்தர்களின் உயிரைப் பாதுகாப்பதற்காக, ஒரு உத்தியோகத்தர் தனது உத்தியோகபூர்வ துப்பாக்கியால் நான்கு தடவைகள் சுட்டுள்ளார். இதில் சந்தேகநபரின் கால் மற்றும் மார்புப் பகுதிகளில் பலத்த காயங்கள் ஏற்பட்டுள்ளன.
துப்பாக்கிச் சூட்டுக்குப் பிறகு, பிரதேசவாசிகளும் பொலிஸாரும் இணைந்து காயமடைந்தவரை வெலிகந்த வைத்தியசாலையில் அனுமதிப்பதற்கு நடவடிக்கை எடுத்த போதிலும், வைத்தியசாலையில் அனுமதிக்கப்படும்போதே அவர் உயிரிழந்திருந்ததாக வைத்தியசாலை வட்டாரங்கள் உறுதிப்படுத்துகின்றன.
இவ்வாறு உயிரிழந்தவர் கந்தக்காடு, சிங்கபுர பிரதேசத்தைச் சேர்ந்த 28 வயதுடைய கார்தி அம்ப்ரோட் கங்கானம்கே திலகசிறி என அடையாளம் காணப்பட்டுள்ளார்.
உயிரிழந்தவர் ஹெரோயின் மற்றும் ஐஸ் போன்ற போதைப்பொருட்களுக்கு அடிமையானவர் என்றும், இதற்கு முன்னர் ஏழு போதைப்பொருள் குற்றச்சாட்டுகளில் குற்றவாளியாக அறிவிக்கப்பட்டுள்ளார் என்றும், மேலும் இரண்டு குற்றவியல் வழக்குகள் விசாரணையில் இருப்பதாகவும் பொலிஸார் தெரிவித்தனர்.
இச்சம்பவம் தொடர்பில் பொலன்னறுவை சிரேஷ்ட பொலிஸ் அத்தியட்சகர் புத்திக மனதுங்கவின் அறிவுறுத்தல்கள் மற்றும் மேற்பார்வையின் கீழ் வெலிகந்த பொலிஸ் நிலைய பொறுப்பதிகாரி உள்ளிட்ட குழுவினர் மேலதிக விசாரணைகளை மேற்கொண்டு வருவதுடன், தப்பிச் சென்ற மற்றைய இரு சந்தேகநபர்களையும் தேடும் நடவடிக்கைகள் முன்னெடுக்கப்பட்டு வருகின்றன.
