15 வயதுடைய சிறுமியை பாலியல் துஷ்பிரயோகம் செய்த சம்பவத்துடன் தொடர்புடையவர்கள் என்ற சந்தேகத்தின் பேரில் அநுராதபுரம் அட்டமஸ்தானாதிபதி பல்லேகம ஹேமரத்ன தேரர் மற்றும் சம்பந்தப்பட்ட சிறுமியின் தாயாரை உடனடியாக கைது செய்யுமாறு அநுராதபுரம் பிரதான நீதவான் சியபத் சசிந்து விக்ரமரத்ன இன்று (08) நிட்டம்புவ பொலிஸாருக்கு உத்தரவிட்டார். இச்சம்பவத்தின் சந்தேகநபராக பெயரிடப்பட்டுள்ள பல்லேகம ஹேமரத்ன தேரர் வெளிநாடு செல்வதைத் தடுக்கும் வகையில், குடிவரவு மற்றும் குடியகல்வு கட்டுப்பாட்டாளருக்கு உடனடியாக அமுலுக்கு வரும் தடை உத்தரவை நீதிமன்றம் பிறப்பித்தது.
இந்த உத்தரவுகளைப் பெறுவதற்காக, தேசிய சிறுவர் பாதுகாப்பு அதிகாரசபையின் தலைவரும், ஓய்வுபெற்ற உயர் நீதிமன்ற நீதிபதியுமான இனோகா ரணசிங்கவின் அறிவுறுத்தலின் பேரில், அந்த அதிகாரசபையின் சட்ட அமுலாக்கப் பணிப்பாளர் சட்டத்தரணி சஜீவனி அபேரத்ன நீதிமன்றத்தில் விடயங்களை முன்வைத்தார். குற்றத்துடன் தொடர்புடையவர் என சந்தேகிக்கப்படும் தேரரைக் கைது செய்யாதது குறித்து அதிகாரசபை பல சந்தர்ப்பங்களில் எழுத்து மூலமாகவும் வாய்மொழியாகவும் விசாரித்த போதிலும், பொலிஸார் அதற்கு உரிய பதிலளிக்கவில்லை என்று அவர் அங்கு வெளிப்படுத்தினார்.
பொலிஸ் விசாரணைகளின் மெதுவான தன்மை காரணமாக பாதிக்கப்பட்ட சிறுமிக்கு நீதி கிடைப்பது தாமதமாவதால், தேசிய சிறுவர் பாதுகாப்பு அதிகாரசபை ஒரு விசேட மனு மூலம் இந்த வழக்கை அழைக்க தீர்மானித்திருந்தது. அங்கு முன்வைக்கப்பட்ட விடயங்களை பரிசீலித்த நீதவான், அட்டமஸ்தானாதிபதி தேரர் மற்றும் சிறுமியின் தாயார் ஆகியோரை இந்த குற்றத்தின் சந்தேகநபர்களாக பெயரிட நிட்டம்புவ பொலிஸாருக்கு அனுமதி அளித்து, அவர்கள் இருவரையும் உடனடியாக கைது செய்து நீதிமன்றத்தில் ஆஜர்படுத்துமாறு உத்தரவிட்டார்.
இந்த பாலியல் துஷ்பிரயோக சம்பவம் தொடர்பாக இதற்கு முன்னரும் மேலும் இரு சந்தேகநபர்கள் தொடர்பில் விசாரணைகள் மேற்கொள்ளப்பட்டன. தற்போதைய வழக்கு நடவடிக்கைகள் 22424/2026 பி இலக்கத்தின் கீழ் நீதிமன்றத்தில் விசாரிக்கப்படுகின்றன.