நேற்று (26) கண்டி மாவட்டச் செயலாளர் அலுவலகத்தின் உத்தியோகபூர்வ மின்னஞ்சல் முகவரிக்கு, வெடிபொருட்கள் கொண்ட வாகனம் ஒன்று வளாகத்தில் நிறுத்தப்பட்டுள்ளதாக அச்சுறுத்தும் செய்தி கிடைத்ததையடுத்து, அலுவலக நடவடிக்கைகள் முழுமையாக ஸ்தம்பித்ததுடன், பெரும் பதற்றமான சூழ்நிலையும் ஏற்பட்டது. எவ்வாறாயினும், பொலிஸ் விசாரணைகளின் பின்னர் இந்த தகவல் பொய்யானது என தெரியவந்துள்ளது.
2021 ஆம் ஆண்டில் இந்திய புலனாய்வுப் பிரிவினால் வெளியிடப்பட்ட அறிக்கை ஒன்று திரிபுபடுத்தப்பட்டு இந்த செய்தி தயாரிக்கப்பட்டுள்ளது என்பதும் தெரியவந்துள்ளது.மாவட்டச் செயலாளர் இந்திக்க உடவத்த அவர்களின் முறைப்பாட்டின் பேரில் உடனடியாக செயற்பட்ட பொலிஸார், சிறப்பு அதிரடிப்படை, வெடிகுண்டு செயலிழப்புப் பிரிவு மற்றும் பொலிஸ் மோப்பநாய் பிரிவினரையும் சம்பவ இடத்திற்கு வரவழைத்து விரிவான பாதுகாப்பு நடவடிக்கைகளை ஆரம்பித்தனர். நேற்று முன்தினம் காலை 9.30 மணியளவில் ஆரம்பமான இந்த தேடுதல் நடவடிக்கைகளின் போது, அலுவலகத்தின் பிரதான நுழைவாயில்கள் மூடப்பட்டதால், பல்வேறு சேவைகளை எதிர்பார்த்து வந்த பொதுமக்கள் பலத்த சிரமங்களை எதிர்கொள்ள நேரிட்டது.
இதற்கிடையில், அலுவலகத்தில் பணிபுரியும் அனைத்து அதிகாரிகளும் உடனடியாக தங்கள் தனிப்பட்ட மற்றும் உத்தியோகபூர்வ வாகனங்களுக்கு வருமாறு பொலிஸார் அறிவுறுத்தினர். இதன் விளைவாக, அவர்கள் தங்கள் உத்தியோகபூர்வ கடமைகளை நிறுத்திவிட்டு வாகனங்களைச் சரிபார்க்கும் நடவடிக்கைகளுக்கு உதவ வேண்டியிருந்தது. முதல் அச்சுறுத்தல் மின்னஞ்சல் பொய்யானது என்று பொலிஸார் உறுதிப்படுத்தி ஒரு மணி நேரத்திற்குள், அதேபோன்ற மற்றொரு செய்தி மாவட்டச் செயலாளர் அலுவலகத்திற்கு கிடைத்ததையடுத்து, அலுவலகத்தில் நிலவிய அச்சம் மேலும் அதிகரித்தது. இதனால் சில ஊழியர்கள் விடுமுறை எடுத்துக்கொண்டு வீடுகளுக்குச் சென்றதாக தெரிவிக்கப்பட்டுள்ளது.
குறிப்பாக, இந்த இரண்டாவது மின்னஞ்சல் செய்தி ஊழியர்களிடையே பரவிய விதம் குறித்து சந்தேகத்திற்கிடமான நிலைமை ஏற்பட்டுள்ளதால், அது தொடர்பாகவும் தனி விசாரணை ஆரம்பிக்கப்பட்டுள்ளது. டிசம்பர் 25 கிறிஸ்துமஸ் விடுமுறைக்கும் டிசம்பர் 27 சனிக்கிழமைக்கும் இடைப்பட்ட டிசம்பர் 26 ஆம் திகதி விடுமுறை எடுத்து நீண்ட வார இறுதி விடுமுறையை அனுபவிக்க பெரும்பாலான ஊழியர்கள் விரும்பும் சூழ்நிலையில், இது ஒரு போலியான மின்னஞ்சலாக உருவாக்கப்பட்டதா என்ற சந்தேகம் எழுந்துள்ளது.
இந்த முழு சம்பவம் தொடர்பான மேலதிக விசாரணைகள் தற்போது மத்திய மாகாணத்திற்கு பொறுப்பான சிரேஷ்ட பிரதிப் பொலிஸ் மா அதிபர் சுதத் மாசிங்கவின் நேரடி மேற்பார்வையின் கீழ் நடைபெற்று வருகின்றன.