பாராளுமன்ற உறுப்பினர் சாந்த பத்ம குமாரவுடன் ஏற்பட்ட சம்பவம் தொடர்பாக பணி இடைநிறுத்தம் செய்யப்பட்ட சூரியகந்த பொலிஸ் நிலையத்துடன் இணைக்கப்பட்டிருந்த பொலிஸ் கான்ஸ்டபிள் இன்று (28) கொலன்ன பொலிஸ் நிலையத்திற்கு வந்தார். சம்பவங்கள் குறித்து வாக்குமூலம் அளிப்பதற்காகவே அவர் வந்தார்.
ஊடகவியலாளர்களிடம் பேசிய அவர், தனது உயிருக்கு பாதுகாப்பு கோரி நேற்று முன்தினம் (26) இரத்தினபுரி பிரதிப் பொலிஸ் மாஅதிபரிடம் சமர்ப்பித்த எழுத்துமூல முறைப்பாடு தொடர்பான வாக்குமூலத்தை வழங்குவதற்காகவே தான் இங்கு வந்ததாகக் குறிப்பிட்டார்.
தன்னைத் தாக்கிய சந்தேகநபர்கள் இன்னும் கைது செய்யப்படவில்லை என்றும், அவர்கள் சுதந்திரமாக நடமாடுவது தனது மற்றும் குடும்ப உறுப்பினர்களின் உயிருக்கு பாரிய அச்சுறுத்தல் என்றும் அவர் மேலும் தெரிவித்தார்.
ஆகவே, தான் பொலிஸ் பாதுகாப்பைக் கோரியுள்ளதாகவும் அந்த பொலிஸ் கான்ஸ்டபிள் ஊடகங்களிடம் தெரிவித்தார். இந்தச் சம்பவம் தொடர்பில் தனக்கு இதுவரை நீதி கிடைக்கவில்லை என்பதையும் அவர் வலியுறுத்தினார்.
இதற்கிடையில், 2025 டிசம்பர் 20 அன்று கொலன்ன பொலிஸ் பிரிவில் ஒரு பாராளுமன்ற உறுப்பினருடன் ஏற்பட்ட சம்பவம் தொடர்பாக, சூரியகந்த பொலிஸ் நிலையத்தில் கடமையாற்றி தற்போது பணி இடைநிறுத்தம் செய்யப்பட்டுள்ள பொலிஸ் கான்ஸ்டபிள் மற்றும் அவரது மனைவி, இலங்கை பொலிஸை விமர்சித்து பல்வேறு ஊடக நிறுவனங்களுக்கு அறிக்கைகளை வழங்கியுள்ளனர்.
அந்த அறிக்கைகளில், சம்பந்தப்பட்ட பொலிஸ் கான்ஸ்டபிளைத் தாக்கி மோட்டார் சைக்கிளை கடத்திச் சென்றவர்கள் இதுவரை கைது செய்யப்படவில்லை என்றும், அவர் செய்த முறைப்பாடு தொடர்பாக பொலிஸ் எந்த விசாரணையும் மேற்கொள்ளவில்லை என்றும் குற்றம் சாட்டப்பட்டுள்ளது.
எவ்வாறாயினும், அந்தச் சம்பவம் தொடர்பாக பொலிஸ் கான்ஸ்டபிள் மற்றும் அவரது மனைவி கொலன்ன பொலிஸிடம் சமர்ப்பித்த முறைப்பாடுகளின் அடிப்படையில், கொலன்ன பொலிஸ் நிலையமும் அத்துடன் எம்பிலிபிட்டிய பிரதேச குற்றப் புலனாய்வுப் பிரிவும் மேலதிக விசாரணைகளை மேற்கொண்டு வருகின்றன.
சம்பவம் நடந்த 2025 டிசம்பர் 20 ஆம் திகதி இரவு, கொலன்ன பொலிஸ் நிலையத்தில் இரவு ரோந்து கடமையில் ஈடுபட்டிருந்த அதிகாரிகள் உடனடியாக சம்பவ இடத்திற்குச் சென்று ஆரம்பகட்ட விசாரணைகளை ஆரம்பித்தனர். அங்கு, சம்பந்தப்பட்ட பொலிஸ் அதிகாரியின் மோட்டார் சைக்கிள் சம்பவ இடத்தில் இருந்து பொலிஸ் பொறுப்பில் எடுக்கப்பட்டது. மேலும், சம்பந்தப்பட்ட அதிகாரி, அவரது மனைவி மற்றும் மேலும் இருவரின் வாக்குமூலங்கள் பதிவு செய்யப்பட்டுள்ளதுடன், எம்பிலிபிட்டிய வைத்தியசாலை பொலிஸாரால் அதிகாரிக்கு சட்ட வைத்திய அறிக்கை படிவமும் வழங்கப்பட்டுள்ளது.
எம்பிலிபிட்டிய பிரதேச குற்றப் புலனாய்வுப் பிரிவினால் மேற்கொள்ளப்பட்ட விசாரணைகளில், தாக்குதல் நடத்தியதாகக் குற்றம் சாட்டப்பட்ட பாராளுமன்ற உறுப்பினர், சம்பவம் நடந்ததாகக் கூறப்படும் இடத்திற்கு அருகிலுள்ள மூன்று குடியிருப்பாளர்கள், அத்துடன் அதிகாரியை வைத்தியசாலைக்கு அழைத்துச் சென்றவர் உட்பட மேலும் பத்து பேரிடம் இதுவரை வாக்குமூலங்கள் பதிவு செய்யப்பட்டுள்ளன.
சம்பவம் நடந்ததாகக் கூறப்படும் இடத்திற்கு அருகிலுள்ள ஒரு வீட்டில் பொருத்தப்பட்டிருந்த பாதுகாப்பு கமரா காட்சிகள் பெற நடவடிக்கை எடுக்கப்பட்டுள்ளதுடன், அந்த வீட்டின் உரிமையாளரிடமிருந்தும் வாக்குமூலம் பதிவு செய்யப்பட்டுள்ளது.
இந்தச் சம்பவம் குறித்து 2025 டிசம்பர் 22 ஆம் திகதி எம்பிலிபிட்டிய நீதவான் நீதிமன்றத்திற்கு அறிக்கை சமர்ப்பிக்கப்பட்டுள்ளதுடன், எம்பிலிபிட்டிய பிரதேச குற்றப் புலனாய்வுப் பிரிவு மேலதிக விசாரணைகளை மேற்கொண்டு வருகிறது.