இலங்கை தேசிய கிரிக்கெட் அணியின் வேகப்பந்து வீச்சாளர்களுக்கான பயிற்சி ஆலோசகராக முன்னாள் சூப்பர் வேகப்பந்து வீச்சாளர் லசித் மலிங்காவை நியமிக்க இலங்கை கிரிக்கெட் சபை நடவடிக்கை எடுத்துள்ளது. 2026 இருபதுக்கு 20 உலகக் கிண்ண கிரிக்கெட் தொடரை இலக்காகக் கொண்டு தேசிய அணியின் தயார்நிலை மற்றும் வீரர் மேம்பாட்டை மேம்படுத்தும் நோக்குடன் இந்த நியமனம் மேற்கொள்ளப்பட்டுள்ளதாக இலங்கை கிரிக்கெட் சபை அறிவித்துள்ளது.
இந்த நியமனம் குறுகிய கால அடிப்படையில் மேற்கொள்ளப்பட்டுள்ளதுடன், இது 2025 டிசம்பர் மாதம் 15 ஆம் திகதி முதல் அமுலுக்கு வரும். அதன்படி, 2026 ஜனவரி மாதம் 25 ஆம் திகதி வரை ஒரு மாத காலப்பகுதிக்கு மலிங்கா தேசிய அணியின் வேகப்பந்து வீச்சுப் படையை பலப்படுத்துவதற்காக தனது பங்களிப்பை வழங்கவுள்ளார்.
குறிப்பாக சர்வதேச கிரிக்கெட் அரங்கில் அபார அனுபவங்களைக் கொண்ட மலிங்காவிடம் உள்ள 'டெத் பௌலிங்' அதாவது இன்னிங்ஸின் இறுதி ஓவர்களை வீசும் தனித்துவமான தொழில்நுட்ப அறிவு, உலகக் கிண்ணம் போன்ற முக்கியமான தொடர்களில் அணிக்கு பெரும் பலமாக அமையும் என கிரிக்கெட் சபை நம்பிக்கை வெளியிட்டுள்ளது. குறுகிய வடிவப் போட்டி முறைகளில் பந்துவீச்சாளர்களின் செயல்திறனை மேம்படுத்துவதற்காக அவரது இந்த நிபுணத்துவத்தைப் பயன்படுத்துவது இலங்கை கிரிக்கெட் சபையின் முக்கிய எதிர்பார்ப்பாக உள்ளது.
இலங்கை மற்றும் இந்தியா இணைந்து நடத்தும் ஐ.சி.சி. (ICC) ஆண்கள் இருபதுக்கு 20 உலகக் கிண்ணத் தொடர் 2026 பெப்ரவரி மாதம் 07 ஆம் திகதி ஆரம்பமாகவுள்ளது. தொடரின் ஆரம்பப் போட்டி கொழும்பு எஸ்.எஸ்.சி. (SSC) மைதானத்தில் நடத்த ஏற்பாடுகள் செய்யப்பட்டுள்ள நிலையில், மலிங்காவின் இந்த பயிற்சிப் பங்களிப்பு இலங்கை வேகப்பந்து வீச்சாளர்களின் தயார்நிலையை மேலும் தீவிரப்படுத்த உதவும்.