கடந்த ஜனவரி 09 ஆம் திகதி தெஹிவளை பிரதேசத்தில் உணவக உரிமையாளர் ஒருவர் சுட்டுக் கொல்லப்பட்ட சம்பவத்துடன் தொடர்புடைய பிரதான சந்தேகநபரை அடையாளம் காண்பதற்காக பொலிஸார் பொதுமக்களின் உதவியை நாடியுள்ளனர்.
தெஹிவளை பொலிஸ் பிரிவுக்குட்பட்ட மரைன் டிரைவ் வீதியில், பீட்டர்ஸ் லேனில் இலக்கம் 59/06 இல் அமைந்துள்ள 'சீ ஷார்க்' (Sea Shark) என்ற ஹோட்டலுக்குள் இந்த துப்பாக்கிச் சூடு சம்பவம் இடம்பெற்றதுடன், அதில் அந்த உணவகத்தின் உரிமையாளர் உயிரிழந்தார்.
இந்த கொலைச் சம்பவம் தொடர்பில் கல்கிஸ்ஸை குற்றப் புலனாய்வுப் பிரிவு தற்போது விரிவான விசாரணைகளை ஆரம்பித்துள்ளதுடன், சம்பவத்தை நேரில் கண்டவர்கள் வழங்கிய தகவல்களின் அடிப்படையில் செயற்கை நுண்ணறிவு (AI) தொழில்நுட்பத்தைப் பயன்படுத்தி துப்பாக்கிச் சூடு நடத்திய சந்தேகநபரின் உருவப்படத்தை உருவாக்க விசாரணை அதிகாரிகள் நடவடிக்கை எடுத்துள்ளனர்.
கொல்லப்பட்ட ஹோட்டல் உரிமையாளருக்கு இதற்கு முன்னர் எந்த உய அச்சுறுத்தலும் இருக்கவில்லை என பொலிஸார் தெரிவித்த போதிலும், அவர் தெஹிவளை மற்றும் கல்கிஸ்ஸை பிரதேசங்களில் பாரியளவிலான போதைப்பொருள் கடத்தல்காரராகக் கருதப்படும் ‘சூவா சமந்தா’ என்பவரின் நெருங்கிய நண்பர் என தகவல் கிடைத்துள்ளது. படோவிட்ட அசாங்காவின் தரப்புக்கும், கொஸ் மல்லி, சூவா சமந்தா மற்றும் போதியவத்த அவிஷ்கா ஆகிய போதைப்பொருள் கடத்தல்காரர்களின் தரப்புக்கும் இடையே நீண்டகாலமாக நிலவி வரும் மோதல் நிலைமையே இந்த கொலைக்கு மிக அண்மைய காரணம் என சந்தேகிக்கப்படுவதுடன், இந்த இரண்டு பாதாள உலகக் குழுக்களுக்கும் இடையே நிலவும் கடுமையான தகராறு காரணமாக இதுவரை இரு தரப்பிலும் 13 பேர் உயிரிழந்துள்ளதாக பொலிஸ் வட்டாரங்கள் தெரிவிக்கின்றன.கொல்லப்பட்ட ‘சனா மாமா’ என்பவர் இதற்கு முன்னர் தெஹிவளை கல்கிஸ்ஸை நகர சபையின் முன்னாள் அரசியல்வாதிகளுடன் தொடர்புகொண்டு கப்பம் பெறுதல் போன்ற நடவடிக்கைகளில் ஈடுபட்டவர் என்றும், பின்னர் பாதாள உலக உறுப்பினர் சூவா சமந்தாவுடன் உறவுகளை ஏற்படுத்திக்கொண்டார் என்றும் தெரியவந்துள்ளது. பிரபல போதைப்பொருள் கடத்தல்காரரான வெலே சுதாவுக்கு சொந்தமாக இருந்து அரசாங்கத்தால் பறிமுதல் செய்யப்பட்ட தெஹிவளை மிருகக்காட்சிசாலைக்கு முன்னால் உள்ள வாகன தரிப்பிடத்தை கட்டுப்படுத்தும் அதிகாரம் நகர சபையால் இவருக்கு வழங்கப்பட்டிருந்தாலும், அதிலிருந்து கிடைக்கும் வருமானத்தின் ஒரு பகுதி வெலே சுதாவுக்கு வழங்கப்பட்டுள்ளது என்றும் தகவல்கள் தெரிவிக்கின்றன.
உருவாக்கப்பட்ட புகைப்படத்தில் உள்ள நபர் குறித்து ஏதேனும் தகவல் தெரிந்தவர்கள் உடனடியாக தங்களுக்கு அறிவிக்குமாறு பொலிஸார் ஊடகங்கள் வாயிலாக பொதுமக்களிடம் கோரிக்கை விடுத்துள்ளனர்.
