தெஹிவளை கடலோரப் பாதையில் அமைந்துள்ள ‘சீ ஷார்க்’ (Sea Shark) சுற்றுலா ஹோட்டலின் உரிமையாளர் கடந்த 09ஆம் திகதி இரவு சுட்டுக் கொல்லப்பட்ட சம்பவம், வெளிநாட்டில் வசிக்கும் ஒழுங்கமைக்கப்பட்ட குற்றவாளியான படோவிட்ட அசங்கவின் நேரடி வழிகாட்டுதலின் பேரில் நடந்ததாக தகவல்கள் வெளியாகியுள்ளன. அன்று இரவு 9.00 மணியளவில் நடந்த இந்த துப்பாக்கிச் சூட்டில் கொல்லப்பட்டவர் தெஹிவளை பிரதேசத்தைச் சேர்ந்த 55 வயதுடைய டி.ஏ.
சனத் அல்லது ‘சனா மாமா’ என அழைக்கப்படுபவர். இறந்தவர் ஹோட்டலுக்குள் மற்றொருவருடன் மது அருந்திக் கொண்டிருந்தபோது, பீர் குடிக்க வந்ததாக நடித்து உள்ளே நுழைந்த துப்பாக்கிதாரிகள் அவரது தலையிலும் மார்பிலும் சுட்டுவிட்டு தப்பிச் சென்றுள்ளனர். பலத்த காயமடைந்த அவர் களுபோவில மருத்துவமனையில் அனுமதிக்கப்பட்ட பின்னர் உயிரிழந்துள்ளார்.கொல்லப்பட்ட ஹோட்டல் உரிமையாளருக்கு இதற்கு முன்னர் எந்த உய அச்சுறுத்தலும் இருக்கவில்லை என்று பொலிஸார் குறிப்பிட்டாலும், அவர் தெஹிவளை மற்றும் கல்கிசை பிரதேசங்களில் பெரிய அளவிலான போதைப்பொருள் கடத்தல்காரராகக் கருதப்படும் ‘சூவா சமந்தா’ என்பவரின் நெருங்கிய நண்பர் என்று தகவல்கள் கிடைத்துள்ளன. படோவிட்ட அசங்கவின் தரப்புக்கும், கோஸ் மல்லி, சூவா சமந்தா மற்றும் போதியவத்த அவிஷ்க ஆகிய போதைப்பொருள் கடத்தல்காரர்களின் தரப்புக்கும் இடையே நீண்டகாலமாக நிலவி வரும் மோதல் நிலைமை இந்த கொலைக்கு மிக அண்மையான காரணம் என்று சந்தேகிக்கப்படுகிறது. இந்த இரண்டு பாதாள உலகக் குழுக்களுக்கும் இடையே நிலவும் கடுமையான தகராறு காரணமாக இதுவரை இரு தரப்பிலும் 13 பேர் உயிரிழந்துள்ளதாக பொலிஸ் வட்டாரங்கள் தெரிவிக்கின்றன.
கொல்லப்பட்ட ‘சனா மாமா’ இதற்கு முன்னர் தெஹிவளை கல்கிசை நகர சபையின் முன்னாள் அரசியல்வாதிகளுடன் தொடர்பு கொண்டு கப்பம் பெறுதல் போன்ற நடவடிக்கைகளில் ஈடுபட்டவர் என்றும், பின்னர் பாதாள உலக உறுப்பினர் சூவா சமந்தாவுடன் உறவுகளை ஏற்படுத்திக் கொண்டவர் என்றும் தெரியவந்துள்ளது. பிரபல போதைப்பொருள் கடத்தல்காரரான வெலே சுதாவுக்கு சொந்தமாக இருந்து அரசாங்கத்தால் கையகப்படுத்தப்பட்ட தெஹிவளை மிருகக்காட்சிசாலைக்கு எதிரே உள்ள வாகன நிறுத்துமிடத்தை கட்டுப்படுத்தும் அதிகாரம் நகர சபையால் இவருக்கு வழங்கப்பட்டிருந்தாலும், அதிலிருந்து கிடைக்கும் வருமானத்தின் ஒரு பகுதியை வெலே சுதாவுக்கு வழங்கியதாகவும் தகவல்கள் தெரிவிக்கின்றன.
ஸ்கூட்டர் ரக மோட்டார் சைக்கிளில் வந்த துப்பாக்கிதாரிகள் இந்த குற்றத்தைச் செய்தபோது, இறந்தவரின் குழந்தையும் அருகில் ஊஞ்சல் ஆடிக்கொண்டிருந்ததாகவும், குற்றம் நடந்த ஹோட்டலில் எந்த பாதுகாப்பு கேமரா அமைப்பும் (CCTV) பொருத்தப்படாமல் இருந்தது விசாரணைகளுக்கு ஒரு பிரச்சினையாக மாறியுள்ளதாகவும் பொலிஸார் தெரிவிக்கின்றனர். எவ்வாறாயினும், சுற்றியுள்ள பகுதிகளில் பொருத்தப்பட்டுள்ள பாதுகாப்பு கேமரா காட்சிகளின் மூலம் துப்பாக்கிதாரிகள் வந்த மோட்டார் சைக்கிளை அடையாளம் காணவும், சந்தேக நபர்களை கைது செய்யவும் பொலிஸார் தற்போது விரிவான விசாரணையை ஆரம்பித்துள்ளனர்.
