சர்வதேச ரெட் நோட்டீஸ் அடிப்படையில் துபாய் அரசில் கைது செய்யப்பட்ட இரண்டு பாதாள உலகக் குற்றவாளிகளும், பாரிய நிதி மோசடி தொடர்பான ஒரு பெண்ணும் கடந்த 16ஆம் திகதி துபாயில் இருந்து இலங்கைக்கு அழைத்து வரப்பட்டனர். இவ்வாறு அழைத்து வரப்பட்ட பெண் கொழும்பு குற்றப் பிரிவின் (CCD) முன்னாள் நிலையப் பொறுப்பதிகாரியின் மனைவி என்பதை குற்றப் புலனாய்வுத் திணைக்களம் உறுதிப்படுத்தியுள்ளது.
கல்கிசை ரத்மலான பிரதேசத்தைச் சேர்ந்த 56 வயதுடைய நிஷாமானி டி சில்வா என்ற இந்தப் பெண், வெளிநாட்டுத் தூதரகத்தில் பணிபுரிந்தபோது 2014ஆம் ஆண்டில் செய்த நிதி மோசடி தொடர்பில் குற்றம் சாட்டப்பட்டவர். அரசாங்கத்தின் ஒரு கோடி ரூபா பணத்தை மோசடி செய்த குற்றச்சாட்டில் கொழும்பு மேல் நீதிமன்றத்தால் சிறைத்தண்டனையும் அபராதமும் விதிக்கப்பட்டிருந்தாலும், அவர் நீண்டகாலமாக சட்டத்திலிருந்து தப்பித்து துபாயில் தலைமறைவாக இருந்துள்ளார்.
இந்த சந்தேகநபர் துபாய் பொலிஸிடம் பிடிபடும்போது, அவரது கணவரான பிரதான பொலிஸ் பரிசோதகரும் சேவையில் இருந்து இடைநிறுத்தப்பட்டிருந்ததாக பொலிஸ் வட்டாரங்கள் தெரிவிக்கின்றன. வெலிகமவில் உள்ள W 15 ஹோட்டலில் நடந்த துப்பாக்கிச் சூட்டு சம்பவத்துடன் தொடர்புடைய குழுவை வழிநடத்தியதால் அவர் இவ்வாறு இடைநிறுத்தப்பட்டுள்ளார், அந்தக் காலப்பகுதியில் அவரது மனைவி வெளிநாட்டில் தலைமறைவாக இருந்துள்ளார்.
அவருடன் இலங்கைக்கு அழைத்து வரப்பட்ட பாதாள உலக செயற்பாட்டாளரான 52 வயதுடைய ரவீன் சமிந்த வீரசிங்க என்ற 'புஞ்சா', கந்தான பிரதேசத்தைச் சேர்ந்தவர் ஆவார். இவர் கடந்த ஆண்டு ஜூலை மாதம் முன்னாள் அமைச்சர் மங்கள சமரவீரவின் செயலாளரான சமீர என்பவரை சுட்டுக் கொன்ற சம்பவத்தில் தேடப்பட்டு வந்த முக்கிய சந்தேகநபர் ஆவார். அந்த துப்பாக்கிச் சூட்டில் ஒருவர் உயிரிழந்த நிலையில், தற்போது சந்தேகநபர் மேலதிக விசாரணைகளுக்காக களனி பொலிஸ் பிரிவிடம் ஒப்படைக்கப்பட்டுள்ளார்.
மற்றொரு சந்தேகநபரான கிரியல்தெனியகே டொன் ரசிக சஞ்சீவ குமார என்ற 'ஊரகஹ சூட்டி மல்லி', எல்பிட்டி மற்றும் ஊரஸ்மன்கந்தியா பகுதிகளை மையமாகக் கொண்டு ஒழுங்கமைக்கப்பட்ட குற்றங்களை இயக்கியவர் என்று பொலிஸார் தெரிவிக்கின்றனர். முப்பது வயதுடைய இவர் பல போதைப்பொருள் கடத்தல் மற்றும் கப்பம் பெறுதல் சம்பவங்களுடன் தொடர்புடையவர் ஆவார், மேலதிக விசாரணைகளுக்காக அவர் எல்பிட்டி பொலிஸ் பிரிவிடம் ஒப்படைக்கப்பட்டுள்ளார்.
